2024-12-06 02:50:00 9
2-декабрь, 2024-жыл. Чыгыш таануу институту Ош шаарынын мэриясына жаңы долбоор сунуш кылды. Ош шаарынын мэри Б.Ж.Жетигенов жана анын орун басарлары ОшМУга келип, окуу жайдын илимий кызматкерлери менен жоолугушуп, Ош шаарындагы көйгөйлөрдү чечүү жана шаардын перспективалуу пландары боюнча маалымат берип, окуу жайдын окумуштууларынын идеяларын шаардын өнүгүүсүнө, проблемаларын чечүүгө жана шаарды санариптештирүүгө кызматташууга, жардам берүүгө чакырды. Окуу жайдын ректору, профессор К.Г. Кожобеков Ош шаарын комплекстүү өнүктүрүүгө окуу жайдын илимий кызматкерлеринин потенциалы жетиштүү жана даяр экендигин билдирди. Ош шаарынын мэриясынын кызматкерлери менен ОшМУнун илимий кызматкерлеринин отурумунда окуу жайдын окумуштуулары тарабынан бир топ илимий долбоорлордун презентациялары болуп, мэриянын кызматкерлери колдоого алаарлык долбоорлор экендигине ынанышты. Чыгыш таануу институту тарабынан дагы "Ош шаарына заманбап зоопарк куруу" боюнча атайын долбоор сунушталды. Долбоорду Чыгыш таануу институтунун директору, доцент Ж.С.Бөтөнөев презентация кылып, долбоор Ош шаарынын социалдык-экономикалык өнүгүүсүнө өзгөчө салым кошоорун белгиледи. Ош шаарынын мэри Б.Ж.Жетигенов Чыгыш таануу институтунун Ош шаарына заманбап зоопарк куруу боюнча долбоорунун перспективасы бар экенин жана колдоого алаарын белгиледи.